Plantun de Prouvènço

Pèr coumpara dos planto d'encò nostre

Erysimum jugicola & Plumbago europaea

Erysimum jugicola

Brassicaceae Cruciferae

Noms en français : Vélar des sources, Vélar nain.

Descripcioun :
Aquesto girouflèio trachis dins li tepeiro roucaiouso e sus li roucas d'auto mountagno. A la primo, fai de mato basso de poulìdi flour jauno. Li fueio de la cambo e lis estamino soun en lanço. Se destrìo de Erysimum ochroleucum emé la coulour di flour (jauno citroun pèr E. ochroleucum) e la formo pu basso de la planto (peréu fai de grano <2,4 mm). Isto uno autro meno proche, Erysimum montosicola, qu'a d'estile mai larg (2 à 3 mm en liò de 1 à 2 eici). Peréu fai mai de 10 fueio à la flourido.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 5 à 25 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Erysimum
Famiho : Brassicaceae
Famiho classico : Cruciferae

Ordre : Brassicales

Coulour de la flour : Jauno
Petalo : 4
Ø (o loungour) flour : 15 à 20 mm
Flourido : Printèms - Estiéu

Sòu : Ca
Autour basso e auto : 1800 à 3000 m
Aparado : Noun
Jun à avoust

Liò : Tepiero roucaiouso - Roucas - Esboudèu - Tepiero seco
Estànci : Subaupen à Aupen
Couroulougi : Ouroufito-Ouèst-Aupenco
Ref. sc. : Erysimum jugicola Jord., 1864

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.